تمنا ائت، گولوم، وئررم، یولوندا نقد، جانیم وار

اگر بولبول ده‌گیلسه‌م، اوندان آرتیق مین فغانیم وار

قارا گؤزلر سنی آلداتماسین، بیمارم عشقینده

علاجیم سنده‌دیر، ای گول، سنه آنجاق گمانیم وار

قبول ائتسن یولوندا جانیمی یوز یول فدا قیللام

اسیرِ عشقینم، سنسیز بو عالمده خزانیم وار

امانت ساخلا قلبینده همیشه عشقیمین سرّین

حقیقی عاشیقم هیجرینده، چشمِ خون فشانیم وار

آلوب تئز جانیمی، بیر دفعه‌لیک قورتار اذیّتدن

باخیلسا کؤنلومه، عشقینده مین درد نهانیم وار

سنی هر شئی‌دن آرتیق سئومیشم عالمده، ای ظالیم!

قضا ایسترسه، گلسین، راه عشقینده توانیم وار

منی هر بی‌وفایه، واحدم، توُتما برابر کیم

منیم ده عشق ملکونده، عزیزیم، آد و سانیم وار

شاعیر: علی آقا واحد

:: موضوعات مرتبط: واحد، ،
:: برچسب‌ها: علی آقاواحد,

 

دولوب محببتون ای شوخ و دلستان دیلیمه***

آلیب قراریمی الدن وئریب توان دیلیمه

کمان قاشون، گؤزون، اوخ کیپریگون، ساچین گؤزه لیم ***

آتیر کمند، چکیر یای گئدیر نشان دیلیمه

آلاولی سینه مین آهی وجودیمی کول ائدر***

اگر سو سپمسه بو چشم خونفشان دیلیمه

یوخومدو چاره دایاننام همیشه چم خمیوه ***

ولی باتیرمیاسان طعنیله تیکان دیلیمه

گتیر جمالیوی قوی سینمه قادان جانیما ***

سرین سرین نفسونله سو سپ یانان دیلیمه

نه قدری گیزله دیرم درد عشقی سینه مده ***

دیلیمده جوشه گلیر غم اولور روان دیلیمه

می الستله مستم نه آبدستله پست***

کی دگمه ییب الیمه جام و استکان دیلیمه

آنا دیلیم ائله شیریندی جاندان ایسته ملی***

آچاندا من دیل آنام چوخ دئییبدی جان دیلیمه

دیلیم شیریندی عسلدن اودور کی غم یئمه رم***

اگر وورا آریلار نیش هر زامان دیلیمه

منم او ترک، کی آدیم غزللرین دوزودو***

من آذر اوغلویام آذر وئریبدی جان دیلیمه

منم او ترک، بخارئیله سمرقندی***

باغیشلاییبلا قرا خالیمه ماتان دیلیمه

منم او ترک، کی غربتده اللی ایل یاشارام ***

تجاوز ائیله مز اهواز و اصفهان دیلیمه

منم او ترک، کی دالدان چیخاردارام دیلینی***

قاهاررام انگینی هر کیم دیسه یامان دیلیمه

منم او ترک، سوزوم جمله سوزلرین گوزیدو***

سوزوم اوزوم کیمی دوز، باغلاما یالان دیلیمه

دیلین فضیلتی یوخدور ملاک تقوادی***

گئد اوز کمالیوه گول گولمه ای فلان دیلیمه

یقول اکرمکم عند ربّی اتقاکم***

قویوب پیمبر اکرم گوزل بیان دیلیمه

همیشه امر به معروف دور منیم هدفیم***

اگر کومک لیق ائده حیّ لامکان دیلیمه

منافقه دئیرم ال گوتور بو تفرقه دن ***

گولوب محاسینیمه یازما داستان دیلیمه

گلین وئره ک ال اله دشمنین قازاق کوکونو***

یئتیرمه زهریلی عقرب کیمی زیان دیلیمه

“کریمی” ام دیلیمی رایج زامان ائده رم ***

توجّه ائتسه آقام صاحب الزّمان دیلیمه

 

 

:: موضوعات مرتبط: کریمی مراغه ای، ،
:: برچسب‌ها: کریمی مراغه ای,

 

اوچور ايلهاميم او قوشلار کيمي کي

ياز وعده سينده

قووزانير ماوي گؤيه تا اوجا باش بير داغا قونسون

کؤرپه قارتال کيمي دير

گاه چکيلير گرزده ن ايتينجه ک

اگله نير گاه ساوالان عشقينه – آغدان – آغاقونسون

هر اوجا داغ کي گؤرورسن باشي قاردلا آغاراندي

اورا بيل کي ساوالاندي

آمما يوخ !

هر اوجا داغ سسيمي السا دا تئز قئيته ره جکدي

سسي قئيته رمک همان يئل بيله جکدي

آخي يئل يولچودو گئتگين اوکي سؤز ساخلايا بيلمز

يئل سؤزو قاپدي قاچيردار اونو کيم هاخلايابيلمز

يئل گئدرگيندي پيچيللارسؤزوکوللار قولاغيندا

سؤزو قربان ائله ير قيرنادا قانقال آياغيندا

چئويره ر سؤز چاناغيندا

جالايارداغلارا هر بير سؤزو مين سؤز تؤره دندي

بيلميرم سيرري ندندي

يئل گئده ر گيندي يئلي ساخلاماق اولماز

يئله بئل باغلاماق اولماز

آمما سن اي سؤزو سينه نده کؤزردن ساوالانيم

کيم گله صدقله زرتشت بئجردن ساوالانيم

ائليمين شانلي داغي باشيوه مين لرجه دولانيم

اريديب ائل غمي بير يول سني کؤکدن ده تالانسان

سئل اولوب قانلي دنيز لر کيمي دونيايه جالانسان

آدي ديللرده قالاناسان

ساوالانسان ، ساوالانسان

ساوالان ائل غميني بللي دي ساخلار سينه سينده

سينه سي کؤزدو آلودور گيزيريک اينسي سي واردير نفسينده

شاعرين غملي سه سينده آلگيلان ساخلاسن اي ائل داغي غملي قفسينده

ساوالان آلسادا هر سيرري سؤزو داغلارا سالماز

گؤره نامرد دوروبدور ساوالاندان سس اوجالماز

ساوالاندا تؤکولن داشلاري ديندير دانيشاللار

سالسا عاشيق نفسين کوللارا آليشاللار

ده ده قود سازي چالسا

ده لي دومرول باش اوجالدار

بلي البته کي يولداس باشيني يولداش اوجالدار

سسله عاشيق سازي چالسين

سسي ميز بيرده اوجالسين

اويناماقليز گي يه دؤنسون

کاس شوشمگوزگويه دؤنسون

قوي وئره ک سس سسه باهم اوخوياق بير ده کوراوغلو دلي سيندن

هجرين قوچ نبي سيندن

اوکي ظاليملري مظلولارين اوستونده ازه ردي

او کي آسلان کيمي داغلاردا ياتيب باغدا گزه ردي

اوخو عاشق اوخو

سن بيل او کي تانري تانييبسان

سؤزومه دوز جالييبسان

سوموگوم قوي سازا گلسين

بولبولوم آوازا گلسين

يازميشام ايوازا گلسين

گوچ آلاق قوي دلي لردن

باج آلاق اجنبي لردن

او کي بيلمير نبي کيمدير قويون آذرائليني مسخره سانسين

بير عؤمور دورکي فضولي ني –  نسيمي ني دانيب ايندي ده دانسين

شهريار تک سن اوجالت باشيوي قوي عرشه دايانسين

قوي باخار کور تر ايچينده جوموبان اؤلسون – اوتانسين

اوکي آخساخدي يوبانسين

اوکي تورکون ديلين اسگيتمه گه تصويره ساليبدير

اوکي تورکون بالاسين ايندي ده آشغالچي سانيبدير

او تفاله بيليرم فيکيريني طاغوتدان  آ ليبدير

او رژيمدندي قاليبدير

يوخسا تورکون بالاسيندا نچيخيب علامه ي دوران

اونا دونيا باش ا يير فلسفه ده

بير جه نه ايران

قوي دئييم شهرياريمدان

نيسگيل او چرچي يه قالسين کي جواهر نه دي ، قانمير

فيکري آللاتما دادير خالقي ،ائلين حالينه يانمير

اريمير ، اؤلمور ، اوتانمير

آخي اي قاردا ، دوماندا باش اوجالدان ساوالانيم

غمي ، دونيا ني قوجالدان ساوالانيم

ائل بيلير داغلار آرا هراوجا داغلار باشي سن سن

وئرسهنده اليوي قارداشيوين سير داشي سن سن

وئر گيلن بير ليک الين بيرده دماونده اونون يولداشي سن سن

اوندان آيريلما آماندي

يولوموز چندي دوماندي

قوي ايگيدلر سيزه فخر ائيله ييبن باشان اوجالتسين

قويما قارتال دولانان يئر لره قوز غون الي چاتسين

ساوالان چنلي چاغيندا

منيم ايلهاميم اولارکن

کؤنلوم اؤز سرري سؤزون صدق ايله سؤيلر ساوالانه

ساوالان کؤز قالادار شاعر اولانلار سينه سينده

اوردا زرتشت گئيب تانريدان ايلهامين آلانه اگيرم باش ساوالانه ، اگيرم باش ساوالانه

 

:: موضوعات مرتبط: هوشنگ جعفری، ،
:: برچسب‌ها: اوستاد هوشنگ جعفری زنگانلی,

اينصاف دي مگر قارپيز آلاق لبلبي چـــيخسين ؟

ايل ده نئچه يول بو باهاليق يوخسولو ييخسين ؟

اينصاف دي مگر تاجير عمي هئي باها ساتسين؟

بير هفته ايچينده كيشي ني يوك ياپي چاتسين؟

دولسون قنووي زير زيبيل ايلـــــــه ايي گلسين ؟

راستا سيزه گئتسين بيزه شينتر – پيي گلسين ؟

اينصاف دي مگر كي خياواندا جـــــــولا اولسون؟

سوت نايلونونو دوخساني يوزدن سولا دولسون؟

اينصاف دي مگر بولبولو سالسين لا قفـــس ده ؟

دينجلميه بير يوخسول عمي سونكي نفس ده؟

انصاف دي جاوان درس اوخويوبسا بئكار اولسون؟

حئيوان اوشاغين ساچلاريني يولداشي يولسون؟

تاكسي شوفئري صوبحه كيمي نوباتا دورسون ؟

سونرا آجيغين آچماق اوچون هئي تله قورسون ؟

انصاف دي مگر بير بئله پول خشـــــــله نه درسه

اؤيرنجي ده هئچ سايمــــــــــا ايشلر اولا ترسه؟

انصاف دي كي فاب اوستونه گلسين ايكي يوزلوق؟

بس هارداقاليب رحم و مروت؟ هاني دوزلوق؟

ال جان چؤره يين اورتا يانــــــــــيب دوره خميردي

حيرصيندن علاج يوخ ، دوداغين دوردو گميردي

پيس - پيس هله گونده دئييري قيمتي آرتسين

اينصافلي عمي دسته ايله گاودارا ساتسين

انصاف دي دويو احتكار اولسون سورا چيخسين؟

ناك اوت ائله سين يوخسولو بيردن يئره ييخسين؟

بيرعيدده يئسين اوققده كي قارني ني شيشسين

بيرعيدده يه ده دوغو آشي هر دؤنه پيشسين

داييم اولالار كلّ رئيــــــــــــس لر جلــــــسات دا

بو تئزليگه چيخماز جلسات دان ، دده يات دا!

شهرين ده اولا هم آشاغي ، يوخاري باشـــــي

حتمن كي اولار گؤرمه ميسن آي بالا ناشـــــي!

حتمن كي گره ك يوخاري باش دا گول اكيلسين

گوللردن اؤتور آيري دؤنه لوله چكــــــــــــــيلسين

آشاغي باشيندا هله قوي جوبلاري دولــــــسون

گول دن سووايي قوي هله اؤز رنگي ده سولسون

تبريزلي ممي بس دي داها قوي سونا چاتسين

دورسون كيشي تئزدن خانيمي بوللوجا ياتسين؟

:: موضوعات مرتبط: سایراشعار، ،
:: برچسب‌ها: محمد رحیمی (تبریزلی ممی),