:: موضوعات مرتبط: سایراشعار، ،
:: برچسب‌ها: سن سیز-شعرترکی,

جانیم نه قدر وار منه جانان سن اولارسان

         جاندان دا عزیز اولسا بیر اینسان سن اولارسان

سن ایندیه دک قلبیم اوچون قلب دین ای یار

         بون دان سورادا جانیم اوچون جان سن اولارسان

هر یاره م ایر اولسا اونون مرهمی سن سن

         هر دردیم اولارسا اونا درمان سن اولارسان

کونلون نئجه ایسترسه ائیله ور منه فرمان

         عومروم نه قدر وار منه سولطان سن اولارسان

ائیلرسم اگر شرحینی ایمانیله کوفرون

        باش حرفیله سر لوحه دیوان سن اولارسان

بوندان بئله آلادتما منی کوفرله دین له

       خاقانیه هم کوفر و هم ایمان سن اولارسان

خاقانی نه دیر گلسن اگر ای گوزو شهلا

     البته کی خاقانیه خاقان سن اولارسان

:: موضوعات مرتبط: خاقانی، ،
:: برچسب‌ها: سن اولارسان-خاقانی,

بیلدیم کی بو نازیندان بیر لحظه دایانمازسان

کونلومده اولان درده هرگیز سن اینانمازسان

معناسی نه دیر دوشسم تورپاغینا ذیلت له؟

اؤپسم ده آیاغیندان بیر حالیمه یانمازسان

سوز وئرمیشدین کامه آمما بو نه تئزلیکله

بیرعومور گئچیب گئتدی اؤز وعده نی دانمازسان

مٍن اؤلمه لی اولسامدا، باری سن اؤزون اولدور

لاکین بیلیرم لطفون ، قانیما بولانمازسان

خاقانی نین هرده ن بیر دؤیدون قاپی سین گؤردون

قان منزلینی باسمیش،قاچدین داها آنمازسان

خاقانی اؤز عشقینده ثابیت قدم اول جان قوی

باش گئتمه سه بو یولدا وصلینی قازانمازسان

:: موضوعات مرتبط: خاقانی، ،
:: برچسب‌ها: بیلدیم کی بو نازیندان بیر لحظه دایانمازسان-خاقانی,

چوخ کچمیشم بو داغلاردان

دورنا گوزلی بولاقلاردان

ائشیتمیشم اوزاقلاردان

ساکت آخان آرازلاری

سینامیشام دوستی، یاری ... 

ائل بیلیرکی، سن منیمسن

یوردوم، یووام، مسکنیمسن

آنام، دوغما وطنیمسن!

آیریلارمی کونول جاندان؟

آذربایجان، آذربایجان! 

من بیر اوشاق، سن بیر آنا،

اودور کی، باغلیام سانا

هانکی سمته، هانکی یانا

هی اوچسام دا یووام سنسن،

ائلیم، گونوم، اوبام سنسن! 

فقط سندن گن دوشنده،

آیریلیق مندن دوشنده،

ساچلاریما دن دوشنده،

بوغار آیلار، ایللر منی،

قیناماسین ائللر منی 

داغلارینین باشی قاردیر،

آغ ئورپگین بولوتلار دیر،

بویوک بیر کچمیشین واردیر،

بیلینمه ییر یاشین سنین

نه لر چکمیش باشین سنین 

دوشدون اوغورسوز دیللره،

نحس آیلارا، نحس ایللره،

نسل لردن نسل لره

کچن بیر شهرتین واردیر

اوغلون، قیزین بختیاردیر ... 

هی باخیرام بو دوزلره،

آلاگوزلی گونددوزلره،

قارا خاللی آغ اوزلره،

کونول ایستر شعر یازا،

گنجله شیرم یازا- یازا ... 

بیر طرفین بحر خزر،

یاشیل باش صونالار گزر،

خیالیم دولانار گزر،

گاه موغانی، گاه ائلداری،

منزل اوزاق، عمر یاری! 

سیرا داغلار، گن دره لر،

اورک آچان منظره لر،

جیران قاچار، جویور مه لر،

نه چوخدور اویلاغین سنین!

آرانین، یایلاغین سنین! 

کچ بو داغدان، بو آراندان،

آستارادان، لنکراندان،

آفریقادان، هندوستاندان

قوناق گلیر بیزه قوشلار،

ظلم الیندن قورتولموشلار ... 

بویرلرده لیمون ساری،

اگیر، سالیر بوداقلاری

داغلارینین دوم آغ قاری

یارانمیشدر قارلی قیشدان،

بیر سنگردیر یارانیشدان 

لنکرانین گلی رنگ- رنگ،

یوردوموزین قیزلاری تک،

دمله چایی، توک ویر گورک،

آنامین دلبر گلینی!

یادلارا آچما الینی! 

ساری سنبل بیزیم چورک،

پامبوغمیز چیچک- چیچک،

هر اوزومدن بیر شیره چک

سحر- سحر آج قارینا

قوت اولسون قوللارینا 

مین قازاخدا کوهلن آتا،

یالمانینا یاتا- یاتا

آت قان تره باتا- باتا

گوگ یایلاقلار بئلینه قالخ،

کپز داغدان گوگ گوله باخ! 

ای آزادگون، آزاد انسان،

دویونجا ایچ بو بهاردان!

بیزیم خاللی خالچالاردان

سر چنارلار کولگه سنه

آلقیش گونش ئولکه سنه! 

کونلوک کچیر قاراباغدان،

گاه بو داغدان، گاه اوداغدان،

آخشام اوستو قوی اوزاقدان

هوالانسین خانین سسی،

قارا باغین شکسته سی 

گوزل وطن، معنان درین،

بشیگیسن گوزللرین!

عاشق دییه ر سرین- سرین،

سن گونشین قوجاغیسان،

شعر، صنعت اوجاغیسان 

ئولمز کونول، ئولمز اثر،

نظامی لر، فضولی لر!

الین قلم، سینه ن دفتر،

دی گلسین هرنه یین واردیر،

دییلن سوز یادگاردیر 

بیر دون بیزیم باکی یه باخ،

ساحللری چراغ- چراغ،

بوروقلارین هایقیراراق

نعره سالیر بوز چوللره،

ایشیقلانیر هر داغ، دره 

نازلاندیقجا سرین کولک،

ساحللره سینه گرک،

بیزیم باکی- بیزیم اورک!

ایشیقدادیر قوت سوزی،

سحرلرین اولکر گوزی 

گوزل وطن! اوگون کی، سن

آل بایراقلی بیر سحردن

الهام آلدین، یاراندیم من

گولور تورپاق، گولور انسان

قوجا شرقین قاپیسی سان! 

دینله منی، گوزل وطن!

بیرسوز گلیر اورگیمدن:

خلقیمیزین عشقیله سن

گوله جکسن هر بیز زمان،

آذربایجان، آذربایجان! 

شعر: صمد وورغون، 1935 میلادی ایلی

:: موضوعات مرتبط: صمدوورغون، ،
:: برچسب‌ها: آذربایجان-صمدوورغون,

باشینا دوندیگیم گل اوزلی صونا!

عمریمین ایلک چاغی یادیما دوشدی

شاعرلر وطنی، بیزیم طرفلر

طرلانین اویلاغی یادیما دوشدی

اوخویون قلبیمی داستان ایچینده

اورک دوگونمزمی آستان ایچینده؟

پاییزین فصلنده، بوستان ایچینده؟

شامامانین تاغی یادیما دوشدی

توکولدی کاغذه سینه مین سوزی

او آنا یوردومون اوجاغی، گوزی

جیرانین دوروشو، دورنانین گوزی

ککلیگین آیاغی یادیما دوشدی

هانی آت سوردیگیم بوراندا، قاردا

گزدیم عاشق کیمی مین بیر دیاردا

گولوب اوینادیغیم طویدا، ماغاردا

قیزلارین قولباغی یادیما دوشدی

گوگلره باش چکیر گویه زن داغی

آخشام آچیق اولور آیین قاباغی

بیزیم گلینلرین بایرام قاباغی

فسه لی یایماغی یادیما دوشدی

سن بیزیم ائللرین روحینا بیرباخ!

بیزدن اینجیمه میشن بیر عزیز قوناق

نشانلی قیزلارین گوروشدن قاباق

تئلینی سایماغی یادیما دوشدی

وورغونون خیالی گزدی آرانی

گوزومده اوینادی داغین بورانی

قیشین بوز قاتیغی، یایین آیرانی

پاییزین قایماغی یادیما دوشدی

صمد وورغون- 1936 ایجی میلادی ایلینده

:: موضوعات مرتبط: صمدوورغون، ،
:: برچسب‌ها: یادیما دوشدی-صمدوورغون,

عاشق باغرینا باس صدفلی سازی

مین جوابلی بیر سئوالدان دانیشاق

میدان قوراق، صحبت آچاق، ساز توتاق،

گل یاناقلی، قوشاخالدان دانیشاق

 

قوی سوز آلیم بیر گناهسیز دوداقدان

دشمن باخیب حسد چکسین اوزاقدان

یار بزه نیب چخان زمان اوطاقدان

یاشینداکی گللی شالدان دانیشاق

 

وورغون دئیه ر، بیر دردبیلن یار اولسون

زلفی بولوت، آغ سینه سی قار اولسون

یاخشی گونده، یامان گونده وار اولسون

قدر بیلن اهل حالدان دانیشاق

صمد وورغون 1937

:: موضوعات مرتبط: صمدوورغون، ،
:: برچسب‌ها: دانیشاق, , صمد وورغون,

منیم ای نازلی دلداریم، منیم ای دردیمه درمان

منیم ای دولتیم، واریم، باغیشلا، گئچ گناهیمدان

سالاندا سن منی بنده، یاخینلیق اولماسا سنده

اگر قانیمی توکسنده، یولومدان دونمرم بیر آن

شیریندیر لبلرین دلبر، او گول رخسارینی گوستر

یازیق کونلوم سنی ایستر، منی الدن سالیر هجران

جمالین پرده یه سالما، بو عاشیقدن اوزاق قالم

اگوزومدن انتقام آلما، منی قویما بئله حیران

بدخشان لعلی سنسن یار، اوزون یاقوت کیمی پارلار

سنون حسنونده دیر گلزار، جمالیندیر نگارستان

منیم چین لیلی، عمر انسان، و یا بلقیس و صنعانسان

یادا بیر ماه کنعانسان، سنه اولسون جانیم قوربان

منی سن مجنون ائتمیش سن، حیاتدا محزون ائتمیش سن

اوزونه مفتون ائتمیش سن، ائدیبسن قلبیمی بریان

دئییردیم من سنین یارین؟ کی اولدوم ایندی بیمارین

سنین نورانی رخسارین، منی یاندیردی، ای جانان

نظامی اولدو بیچاره، ائدیب هجرانین آواره

تاپیلمیر دردینه چاره، اولوب جاری گوزوندن قان

:: موضوعات مرتبط: نظامی گنجوی، ،
:: برچسب‌ها: جمالیندیر نگاریستان-شعرترکی نظامی,

شمعی صوندور دخی پروانه کی یاریم گلدی

گوله باخ آغلا بولود نازلی نگاریم گلدی

گئجه بایرام ائدرم جانیمی قربان سنه یار

سروریم، تاجی سریم، باغلی باهاریم گلدی

قامتین سرو سنین، جنتی گزدیم تایی یوخ

چاکری اولدوغوم اول شاهی سواریم گلدی

حسنونون شمعینه پروانه دئییب دوندی کوله

آتشیم صوندورن اول لاله عذاریم گلدی

دئدیم ای نازلی ملک سئو بو نظامینی دئدی:

سنینم عهد ائله دی چشم خماریم گلدی

:: موضوعات مرتبط: نظامی گنجوی، ،
:: برچسب‌ها: نگاریم گلدی-نظامی,

آی اوزلو نگاریم کیمه مهمان اولاجاقسان

بیر سویله کیمین شانینه شایان اولاجاقسان

شاهلیق چتری وار باشین اوستونده بو آخشام

عنبر چترینله کیمه سلطان اولاجاقسان

شکر دئمیرم من سنه اوندان دا شیرین سن

دلبر نئجه بیر بختوره جان اولاجاقسان

ظلمت گئجه سن نورلی چیراغ، پیس گوزه گلمه

ای آب حیات سن کیمه جانان اولاجاقسان

گئتدین نئجه بس تاب ائله سین هجره نظامی

او خسته ایکن، سن کیمه درمان اولاجاقسان

:: موضوعات مرتبط: نظامی گنجوی، ،
:: برچسب‌ها: دیلبر, , , نیظامی گنجوی,

هرگئجه‌م اولدو سحر غصه فلاکت سنسیز

هر نفس چکدیم هدر گئتدی، او ساعت سنسیز

سنین اول جلب ائله‌ین وصلینه آند ایچدیم اینان

هیجرانینه یاندی کؤنول، یوخ داها طاقت سنسیز

اؤزگه بیر یاری نئجه آختاریم ای نازلی صنم

بیلیرم سنده‌دی دل، یوخ یارا حاجت سنسیز

سن منیم قلبیمه حاکیم، سنه قول اولدو کؤنول

سن عزیزسن من اوجوز بیر هئچم، آفت سنسیز

سن "نیظامی"دن اگر آرخایین اولساندا گولوم

گئجه گوندوز آراییب اولمادی راحت سنسیز

:: موضوعات مرتبط: نظامی گنجوی، ،
:: برچسب‌ها: سنسیز, , , نیظامی گنجوی,

مــاه است نمی دانم، خــورشیــد رخــت یا نه                              

                               بــو آیــریلیق اودونـــا، نئجـــه جییـــه ­ریم یـانه؟

مــردم ز فـــراق تــو ، مـــردم کــه همــه داننــد                              

                               عشق اودو نهان اولماز، یـانار دوشه­ جک جانه

ســودای رخ لیـلی ، شـد حــاصل مــا خیـلـی                              

                               مجنــون کیمی واویلا، اولـــدوم گـئنــه دیــوانه

صــد تیـــر زنــد بــر دل ، آن تــرک کمــان ابــرو                              

                               فتنــه ­لی آلا گــؤزلــر، چــون اویخــودان اویــانه

ای شاه شجاع الدین، شمس الحق تبریزی!                              

                               رحمتــدن اگــر نـــولا ، بیـــر قطــره بیــزه دامه

 

:: موضوعات مرتبط: سایراشعار، ،
:: برچسب‌ها: آیریلیق اؤدی(حکیم مولوی),

مئی‌یه باتمیش دوداغین گور نه گئتیردی باشیما

هوشومو باشدان آلیب سونرا گوونمه هوشوما

ائله سنسیزله‌میشم نانه‌یه بنزر اوره‌یم

گل تَلَس، گل عزیزیم، بیر باشا گیر آغوشوما

اؤز الینله بو جواهیر ائوینی باغلامیسان

باری اینصاف ائله سن گل بو لبی خاموشوما

قارا زولفون یوخودا سؤیله‌ییر افسانه منه

او دؤنوب صوبحه جن هم صوحبتیمه سیر داشیما

منم اول قومری کی صائیب او یاشیل سرو آغاجی

یارپاغیندان عبا تیکمیش کی گلیر چوخ خوشوما

شاعر: صائب تبریزی

:: موضوعات مرتبط: سایراشعار، ،
:: برچسب‌ها: مئی‌یه باتمیش دوداغین(صائب تبریزی),

او قـارا زولف که هر دم دولاشیـر شانه‌لره

 گؤستریر عشق کمندین دل دیوانه‌لره

مهرِ روخسارینی مندن کسوب اول ماه تمام

دوشدی فرصت یئنه بوندان بئله بیگانه‌لره

یوخسا، ای گول بو قدر باده‌ی ناب ایچمه‌ز ایدیم

شوقِ لعلین منی جلب ائیله‌دی میخانه‌لره

قانا دؤنسون، گؤروم، اول باده‌ی گولگون سنسیز

بیر ده، گر رغبت ائدیم ساغر و پیمانه‌لره

حسرت چشمِ خمارین، لبِ لعلین هـوسی

گؤستریر گوشه‌ی میخانه‌نی مستانه‌لره

شوقِ روخسارین ایله اودلارا یانمش کؤنلوم

اؤرگه‌دیب شمعده یانماقلیغی پروانه‌لره

جؤرین آز ائت منه، قورخوم بودو، بیر آه چکیم

بیر یانار اود دوشه باشدان باشا کاشانه‌لره

واحدم، شاعیر آزاده پرستم، نه غمیم!

قیلماسام رغبت اگر مسجده، بوتخانه‌لره

شاعیر: علی آقا واحد

 

:: موضوعات مرتبط: واحد، ،
:: برچسب‌ها: دیوانه‌لره(واحد),

بیزی مردانه دوغمشدیر طبیعت ابتدا سیندان

 عدونین قورخماریق قانلار توکن نوک جدا سیندان

اولونجه شکوه‌یه دیل آچماریق اعدای بی‌رحمین

اگر یوز یول کسیلسه باشیمیز تیغ جفا سیندان

عدولر باغرینی چاتلاتمیشیق میدان حرب ایچره

بیز اول فاتحلریک حقین ظفرپرور صدا سیندن

شرار تیغمیزدن هر زمان دشمن فرار ایتمیش

قاچار خفاش بد طینت نیجه شمسین ضیا سیندان

شهید اولماق فقط حریّت اوغروندا سعادتدیر

اسارتله حیاتین بی‌ثمر ذوق و صفا سیندان

سئورسه‌ک کاوه تک آزاده‌لیک، مظلوم دنیانی

خلاص ایتمک گره‌ک ضخاک عصرین هر بلا سیندان

اگر مظلومی قورتارماقسا مقصد ظلم ظالمدن

گره‌ک بالمرّه ییخماق قلعه‌ی ظلمی بنا سیندان

شاعیر: علی آقا واحد

 

:: موضوعات مرتبط: واحد، ،
:: برچسب‌ها: شهید اولماق(واحد),

بیر اوغرو گلیب هر نه دئسن وار اونا قابی

 

حیرت‌ده قویوب هم منی هم شیخ ایله شابی

بال گورسه دویونجاق اونو بارماقلایاجاق‌دیر

بارداقه توکوب ایچمه‌لی‌دیر گورسه دوشابی

چوخ‌دان چوخا آزدان آزا قانع‌دی ایشینده

مشکل وئره الده‌ن بئله بیر کار ثوابی

انصاف‌لی دی خوف و خطری هاممیا بیر دیر

بیر نمره آلار مدرسه‌ده مهر و عتابی

بو اوغرو نه تاجردی نه قاضی نه وزیر دیر

آج قالماقین اوستن‌دی ایاب ایله ذهابی

ایش‌سیزدی ولی اهل و عیالین دیشی واردی

دیش‌لیک دیله‌یه‌ن اولادینا یوخدو جوابی

بو اوغرو اوزونده‌ن آجا حاشا تله قورسون

توخ اوغرویا همیانی‌ده وار بند و طنابی

بیر اوغرودا وار ظاهری خوش رتبه‌سی والا

دنیا منیم اولسون‌دی اونون جمله عذابی

چیرکین لیگی‌نین اورتوب اوزون جامه‌ی الوان

بیر قورخولو موجود ایدی رد اولسا نقابی

یای گلسه گوزه‌ل یایلاقی ساحل قیراغین‌دا

قیش اولسا بوران اینجیده بیلمز او جنابی

گوندوز نازینا مشتری‌دی میز ریاست

سون‌سوز گئجه‌لرده پر قو اوسته‌دی خوابی

قوللوق‌چو سونون دائم ایپک دستمال الینده

ماستون‌چو سونون شیش ده مهیادی کبابی

نیسگیل کوکونو قازمادا مانقال ماشا حاضر

گر نشئه‌نی تخت ائیله‌مه‌سه باده‌ی نابی

دولت حقوقون دا او داوام یوخ اوده بیلسین

بئش گون بو گئنیش لیک‌ده حساب ایله کتابی

ناچار سالیب دیر اله بیر حکم بو اوغرو

قادر دی اگر بیر گئجه‌ده چاپسا سرابی

چون قافیه حکم ایله سراب‌دان آد آپاردیم

حتماً قلمین شاکی‌یه کافی‌دی جوابی

مین‌سه دالووا بیزله‌یه‌جک مقصده چاتسین

مین‌سون دالینا چاپمالی‌دی خوش‌دو رکابی

مسجدده تمرد ائله‌مز اهل نمازه

میخانه‌ده ضایع ائله‌مز دور شرابی

هر کس دئیه بیلمز قاشون اوستون‌ده گوزون وار

الا او کی اوندان قازانیب رنگ و لعابی

بو اوغرویا کیم اوغرو دئسه باشی خطرده

او اوغرو همان اوغرو فلانی‌دی شهرده

بیر شهرده کی اوغروسونون یوخدو چیخاری

اول شهرده اولدوز سایاراق گوزله‌مه یاری

گئج گلمه سینه اینجیمه تئز گلسه یقین بیل

ائل‌لر آرا حیثیت‌ووی قونشون آپاری

باخ اوغرویا عبرت ائله؛ خالقین شهرین‌ده

اوچ مین دونه میلیارد تومن چکدی یوخاری

نه دوشدو خاما بئل بوخونو قددی بوکولدو

نه ذره‌جه ائل‌لر آرا اسکیل‌دی وقاری

یخچالی قویوب چیگن‌اینه امما بیزیم اوغرو

هم دورگونو یئل‌لندی همی قیردی داماری

اونلار بئجره‌ن اوغرو تورونتوی‌دا توی ائتدی

بیزلر بئجره‌ن اوغرو گئدیب گزدی نیاری

دریا پولا یئر وئردی او اوغرو بالا کیف‌ده

امما بونون اون مین تومن این دوتمادی گاری

او کندی چاپان چاغ‌دا گئدیب کاتدانی گوردو

بو بیر کئچی کتده‌ن گوتوروب اولدو فراری

او ال‌ده چراغ ایسته دیگین سئچدی آپاردی

بو بیر دریز اوتدان اوتوری یاخدی فناری

او خلقی سویوب بای بای ایلان چیخدی وطن‌ده‌ن

بو قارنی‌نین اوستونده گئدیر دوستاغا ساری

اوخشاتدی اونون قیش گئجه‌سین یازه اوغورلوق

بو اوغرویا بیر آن دا خزان ائتدی بهاری

گئت اوغرودا اولسون ائله‌بیر اوغرو اول ائل‌لر

قربان ائده‌لر هیکل اینه دار و نداری

بیر اوغرونو مامورایله گوردوم کوچه میزده

قولباق بیر الینده او بیری ال‌ده بخاری

زاغ زاغ بدنی تیتره‌مه‌ده شاخدا اونون‌ده

آرنین‌دا خجالت تری اوزده‌ن یئره جاری

سوردوم نه خطا چرتیب الینده‌ن بو اسیرین

آیدین منه ذکر ائیله سنی حضرت باری

تیکدی ائله گوز هیکلیمه باش‌دان ایاقه

بیر اووچو دو ات داش ائله‌یر سان کی شکاری

چیمخیردی تبخترله منه: کور کی دگیل سن!

آیا بو بخاری‌ده‌ن آغیر مدرک کاری

گوردوم نه بخاری کی تداعی ائدیر آنجاق

تهران‌دا قجر عصری نی مسکوودا تزاری

گوزلرده‌ن ایراق چون کی چیخیب آشغال ایچین‌ده‌ن

پارتداق پامادورلان بزه‌نیب جسم نزاری

ماموره دئدیم کور دگیل‌ام وئرسن اجازه

ثابت ائده بیل له‌م کی اوتوزدون بو قماری

گر اوغرو دوتورسان بو یازیق دوغرو دی سن‌ده‌ن

اینجیتمه داریخدیرما بو زاری سنی تاری

گر حکم وارون آج دوتاسان وقتی یوباتما

دوستاق‌دا آپار میل ائله‌یه بلکه ناهاری

احسن بئله ماموره کی بوشان‌لی شهرده

هوش باشدا جیمیز بانددان آرتیق‌دی عیاری

بیرده یئری اولسا او عزیز قاضی‌یه عرض ائت

دورونده کی توخ اوغرولارین یوخدو شماری

مال میدانی‌نین اوغروسونا بیر کئچی بسدیر

لعنت لیگ ائده حشره کیمین ایل و تباری

گئت قصرلرین ایچره گزیش اوغرونو بلکه

منصور کیمین شوط ائده‌سن چوبه‌ی داری

یوخ سهو ائله‌دیم حقی اونود «عاصمه» باخما

بیر عومردی چیگن‌اینده گزیر سنگ مزاری

قوی عومرو ووروبدور باشا بئش گون‌ده دئینسه

تا گلسه اجل جامی اونون جانینه ساری

شاعر: پرویز عاصم اردبیلی

:: موضوعات مرتبط: سایراشعار، ،
:: برچسب‌ها: اوغرو منظومه‌سی(پرویز عاصم اردبیلی),

تمنا ائت، گولوم، وئررم، یولوندا نقد، جانیم وار

 

اگر بولبول ده‌گیلسه‌م، اوندان آرتیق مین فغانیم وار

قارا گؤزلر سنی آلداتماسین، بیمارم عشقینده

علاجیم سنده‌دیر، ای گول، سنه آنجاق گمانیم وار

قبول ائتسن یولوندا جانیمی یوز یول فدا قیللام

اسیرِ عشقینم، سنسیز بو عالمده خزانیم وار

امانت ساخلا قلبینده همیشه عشقیمین سرّین

حقیقی عاشیقم هیجرینده، چشمِ خون فشانیم وار

آلوب تئز جانیمی، بیر دفعه‌لیک قورتار اذیّتدن

باخیلسا کؤنلومه، عشقینده مین درد نهانیم وار

سنی هر شئی‌دن آرتیق سئومیشم عالمده، ای ظالیم!

قضا ایسترسه، گلسین، راه عشقینده توانیم وار

منی هر بی‌وفایه، واحدم، توُتما برابر کیم

منیم ده عشق ملکونده، عزیزیم، آد و سانیم وار

شاعیر: علی آقا واحد

:: موضوعات مرتبط: واحد، ،
:: برچسب‌ها: جانیم وار(واحد),

کؤنلوم سنه وابسته‌دیر، ای شوخ، بیر ایل‌دیر

 

نه اؤلدورور عشقین منی آخر، نه دیریل‌دیر

عاشقلرینی قصدین اگر محو ائیله‌مک‌سه

من حاضیرم، اوّل منه مقصود دینی بیل‌دیر

مئیلیم سنه‌دیر، بیر سنه عالمده اسیرم

ایسترایسه‌ن آزاد ائیله، ایسترایسه‌ن اُول‌دیر

کج باخما، بوتون خلق‌ده گر بیر- بیره، ظالم

زولفون گرهین آچما کی، غارتگرِ دیل‌دیر

مبهوت ائله‌یوب عالمی آیینه‌ی رویین

نه شکل و شمایلدی، بو نه حُسن جمیل‌دیر!

روخسارینه اول خال سیه دیرمی دوزولموش؟

یا برگِ گول اوسته سپیلوب دانه‌ی هئل‌دیر؟

واحد، دئمه‌کیم، یار ایله شیریندی مئی ایچمک

زهر اولسون او عشرت کی، حکیمانه دگیل‌دیر

شاعیر: علی آقا واحد

:: موضوعات مرتبط: واحد، ،
:: برچسب‌ها: غارت‌گرِ دل(واحد),

گؤزه‌لیم گوزلرینین صحبتی هر یاندا اولور

 

بو ملاحتلی باخیشلار قوزی جیراندا اولور

بیر علاج ائت منه، ایستکلی طبیبیم سن‌سن

عاشیقین چاره‌سی اوز سئودیگی جاناندا اولور

بولبول ایستر گولی طوطی- شکری، من‌ده- سنی،

عشق سوداسی بو اوچ عاشیق نالاندا اولور

نه طبیعت گوروب عمرونده، نه دنیا یئتروب

او گؤزه‌ل‌لر کی، بیزیم آذربایجاندا اولور

گول اگر بولبولی اینجیتسه، وفاسیز دئمه‌یین

قیزلارین تقصیری اولماز؛ گنه اوغلاندا اولور

بو گؤزه‌ل‌لیک که سنین وار، گؤزه‌لیم، انصافاً

نه ملک‌ده، نه پری‌ده، نه ده انساندا اولور

مبتلا کونلومه، بیلمم نه اولوب هر گون ایتیر

آختاریر کن یئنه اول زولف پریشاندا اولور

واحدین بللی ده‌گیل مسکنی پروانه کیمی

گاه شمعه دولانیر، گاه گولوستاندا اولور

شاعیر: علی آقا واحد

:: موضوعات مرتبط: واحد، ،
:: برچسب‌ها: جیراندا اولور(واحد),

موسیقی مجلسی‌نین طرفه علامت‌لری وار

 

گوش قیل گور نئجه جانسوز حکایت‌لری وار

موسیقی ذوقینه اول کس کی، ده‌گیلدیر واقف

بو بساطین نه بیلیر، کیم نه شرافت‌لری وار

تاری، بیهوده حساب ائتمه، اگر عارف‌سن

گورکی، مه‌رولر الیندن نه شکایت‌لری وار

اودا بیر زلفی سیه دلبرین آلوده‌سی‌دیر

که صداسیندا پریشانلیق اشارت‌لری وار

خوار، ظّن ائتمه، ساکین، موسیقی خادملرینی

اونلارین ذوقینه گیر، گور نه نزاکت‌لری وار

موسیقی غم داغیدیر، ذوق وئریر انسانه

درک قیلماز بونی اونلار کی، سفاهت‌لری وار

شاعرین، موسیقی خادملری‌نین، رسّامین

اینجه دقتله دوشون، گور، نه مهارت‌لری وار

موسیقی ذوقی هلاکولره، تاثیر ائتمیش

اوخو تاریخی، دوشون، گور نه روایت‌لری وار

بعضی نادان نه بیلیر موسیقی ذوقین، واحد!

چونکی جاهلدیلر، اولدوقجا جهالت‌لری وار

علی آقا واحد

 

:: موضوعات مرتبط: واحد، ،
:: برچسب‌ها: موسیقی مجلسی(واحد),

ای ییخان، کؤنلوم ائوین، قیل حذر افغانیمدان

 

ائوین آباد اولا، ال چک دلِ ویرانیمدان

منی مجنون‌ایله فرهاده برابر توتما

من اولاردان‌دا، هنرله گئچه‌رم جانیمدان

بیرجه گَل گور، نه جفالار چکیرم زولفوندن

خبرین یوخدو سنین، حالِ پریشانیمدان

طعن ائدیر ائل منه «یارین نه وفاسیز چیخدی؟»

ای وفاسیز، دئمیرم من بونو اؤز یانیمدان

سانکی باشدان باشا، بیر شعله‌ی آهیم گئجه‌لر

شمعلر، اودلانیر، آهِ دلِ سوزانیمدان

نئیله‌رم من گولو، یا لاله‌نی، انصافیم وار

اونلارین هانسی گؤزه‌ل‌دیر رخ جانانیمدان

وطنیمده نئجه من ایسته‌مه‌ییم بیر گولو کیم

جانی جانیملا بیر اولسون، قانی‌دا قانیمدان

واحدم، عصریمیزین ایندیکی فرهادی منم!

کیم منی آیری سالار خسروِ خوبانیمدان؟

شاعر: علی آقا واحد

:: موضوعات مرتبط: واحد، ،
:: برچسب‌ها: قیل حذر افغانیمدان!(واحد),

صابر! ای محترم بؤیوک شاعیر!

 

شعرده، نظم و نثرده ماهیر!

یازدیغین داهیانه مضحکه‌لر

گؤستریر خلق ایچینده معجزه‌لر

بیلیدیریر منجه هر کسه هنرین،

اوخونور هر بیر ئولکه‌ده اثرین

داد ائدردین همیشه: «حرّیت»!

او اسارتده گؤردیگین ملّت

ایندی آزاده عؤمر ائدیر خرّم،

بیتدی مظلومو آغلاداق ماتم...

ایندی بیر دربدر اوشاق یوخدور

اونلارین زحمتین چکن چوخدور

نا خلف بیلمه یوکسله‌ن ائلینی

قوردولار هر طرفده هیکلینی

بیرده سیزلارمی قلب مجروحین؟

بیزی البّته سئیر ائدیر روحین

بو تفاخر سنه کفایت‌دیر،

ملّتین ایسته ینجه راحت‌دیر

اؤلدون، افسوس‌لر، که بی‌حرمت!...

وئرمه‌دی وارلیلار سنه قیمت

گر اولایدین سووه‌ت زمانیندا

شرفین چوخدی کتله یانیندا

سنه قیمت قویاردی جمعّیت،

یاشایاردین همیشه بی‌منّت

نئجه شاعرلر ایندی خوش‌گذران

کچیریرلر، گونش کیمی خندان

بو بیزیمچون بؤیوک سعادت‌دیر

شانلی، تاریخی بیر شرافت‌دیر

شاعر: علی آقا واحد

:: موضوعات مرتبط: واحد، ،
:: برچسب‌ها: صابر(واحد),

فکرینده‌می، بیر گون گؤزه‌لیم، بیز سیزه گلدیک؟

 

سیزدن قاییدیب، سونرا برابر بیزه گلدیک؟

گُولدوک و دانشدیق گئجه‌نی، صبح آچیلینجا

بیر غنچه گول اوستونده، سیزینله سؤزه گلدیک

کئف چکدیگیمیز خاطره‌لر، وارمی یادیندا؟

گولشنده بیر آیدین گئجه‌ده، اوز اوزه گلدیک

خیلی دولانوب سئیرائیله‌دیک گول‌لر ایچینده

بیر-بیریمیزه چوخ عشوه‌لی، چوخ بامزه گلدیک

بیزکی، گؤزه‌لیم، جان دئیه‌رک، جان ائشیدیردیک

بس ایندی نه اولدو بیزه، یوخسا گؤزه گلدیک!!

نه سنده وار اول مهر و محبت، نه‌ده منده

سوندوک ایشیق اولدوز کیمی، سون منزله گلدیک

واحد، او گئچه‌ن گونلری، بیر مرّه اوُنوتدوق

لیکن یئنی دنیایه، بیز ایندی تزه گلدیک

شاعر: علی آقا واحد

:: موضوعات مرتبط: واحد، ،
:: برچسب‌ها: بیز سیزه گلدیک!(واحد),

ای اسیر دام غم، بیر گوشه‌ی مئیخانه توت

 

توتما زوهّادین مخالف پندینی، پئیمانه توت!

دیشله‌دیمسه لعلین ای قانیم تؤکن! قهر ائیله‌مه

توت کی قان ائتدیم، عدالت‌ایله، قانی قانه توت!

گر سنه افغانیمی بیهوده دئرسه مدّعی

اول سؤزه توتما قولاق، من چکدیگیم افغانه توت

قیلمازام زنجیر زلفون ترکین، ای ناصح! منی

خواه بیر عاقل خیال ائت، خواه بیر دیوانه توت!

ای اولوب سلطان، دئیه‌ن دونیادا مندن غیری یوخ

سن اؤزون بیر جُغد بیل، دونیانی بیر ویرانه توت

ای فضولی! دهر زالی‌نین فریبیندن ساقین

اولما غافل، ارگیبی ترپن، اؤزون مردانه توت

شاعر: ملامحمد فضولی

:: موضوعات مرتبط: فضولی، ،
:: برچسب‌ها: اسیر دام غم(فضولی),

حسنون اولدوقجا فزون، عشق اهلی آرتیق زار اولور

 

حسن نه مقدار اولورسا، عشق اول مقدار اولور!

جنّت اوچون منع ائدن عاشقلری دیداردان

بیلمه‌میش کیم جنّتی عاشقلرین دیدار اولور

عشق دردیندن اولور عاشق مزاجی مستقیم

عاشقین دردینه درمان ائتسه‌لر بیمار اولور

زاهد بی‌خود نه بیلسین ذوقونو عشق اهلی‌نین؟

بیر عجب مئی‌دیر محبّت کیم ایچن، بیدار اولور!

عشق سئوداسینا صرف ائیلر فضولی عمرونو

بیلمزم بو خواب غفلتدن هاچان بیدار اولور؟

شاعر: ملامحمد فضولی

:: موضوعات مرتبط: فضولی، ،
:: برچسب‌ها: فزون حسن,

عشقدن جانیمدا بیر پنهان مرض وار، ای حکیم

 

خلقه پنهان دردیم اظهار ائتمه، زنهار، ای حکیم!

وار بیر دردیم کی چوخ درماندان آرتیقدیر منه

قوی منی دردیم‌له درمان ائیله‌مه، وار، ای حکیم!

گر باسیب ال نبضیمه، تشخیص قیلسان دردیمی

آل امانت، قیلما هر بی‌درده اظهار، ای حکیم!

گل منیم تدبیر بیهوده‌مده سن بیر سعی قیل

کیم اولام بو درده آرتیقراق گرفتار، ای حکیم!

گؤر تنِ عریان ایله احوالیمی هیجران گؤنو،

وار ایمیش روزِ قیامت، قیلما انکار، ای حکیم!

چکمه‌یینجه چاره‌ی دردیمده زحمت بیلمه‌دین

کیم اولور درمانِ درد عشق دشوار، ای حکیم!

رنج چکمه صحّت اوچون، ال فضولی‌دن گؤتور

کیم قبول صحّت ائتمز بؤیله بیمار ای حکیم!

شاعر: ملامحمد فضولی

:: موضوعات مرتبط: فضولی، ،
:: برچسب‌ها: ای حکیم!,

آشیان مرغ دل، زلف پریشانیندادیر

قاندا اولسام ای پری! کؤنلوم سنین یانیندادیر

عشق دردیله خوشام، ال چک علاجیمدان طبیب!

قیلما درمان کیم، هلاکیم زهری درمانیندادیر

چکمه دامن ناز ائدیب افتاده‌لردن، وهم قیل!

گؤیلره آچیلماسین اللر کی، دامانیندادیر!

گؤزلریم یاشین گؤروب شور، ائتمه نفرت کیم بو هم

اول نمک‌دن‌دیر کی لعل شکّر افشانیندادیر

مست خواب ناز ائدیب جمع ائت دل صد پاره‌یی

کیم اونین هر پاره‌سی بیر نوک موژگانیندادیر

بس کی هجرانیندادیر خاصیت قطع حیات

اول حیات اهلینه حئیرانام که هجرانیندادیر

ای فضولی! شمع تک مطلق آچیلماز یانمادان

تابلار کیم سونبولوندن رشته‌ی جانیندادیر

شاعر: ملامحمد فضولی

:: موضوعات مرتبط: فضولی، ،

غم دیاریندا اجل پیکی گذار ائتمز منه

 

یوخ سانیب واریم مگر کی اعتبار ائتمز منه؟

یار جور ائتمز منه اغیار تعلیم ائتمه‌دن

بالله اغیار ائیلین احسانی یار ائتمز منه!

داغیدیر هر لحظه برگ عیشیمی آهیم یئلی

هانسی ناحق ظلم‌دور کی روزگار ائتمز منه؟

عشق دردیله خوشام، ترک نصیحت قیل رفیق

من کی تریاکی مزاجم، زهر، کار ائتمز منه

چرخدن آشیرمادان یادینلا آه آتشین

قدر ائدیب گردون، شرردن زر نثار ائتمز منه

نقد جان تاراج غمدن ساخلاماق دشوار دیر

عشق تا سنگ ملامتدن حصار ائتمز منه

یاد لعلینله فضولی گؤزله‌ییب راه عدم

وار بیر تدبیری، اما آشکار ائتمز منه

شاعر: ملامحمد فضولی

:: موضوعات مرتبط: فضولی، ،

یئنه اول ماه منیم آلدی قراریم بو گئجه

 

چیخاجاق‌دیر فلکه ناله و زاریم بو گئجه!

شمع‌وش محرم بزم ائیله‌دی اول ماه منی

یاناجاق‌دیر یئنه هیجر اودونا واریم بو گئجه

هم وصالی اورار اود جانیما، هم هیجرانی

بیر عجب شمع‌ایله دوشدو، سر و کاریم بو گئجه!

نه توتون‌دور کی چیخار چرخه، دل زاره مگر

هیجر داغینی اورار لاله عذاریم بو گئجه!

صبحه سالدی بو گئجه شمع کیمی قتلیمی هیجر

اولا کیم صبح گلینجه، گله یاریم بو گئجه

پاره- پاره جیگریم، ایت‌لرینه نذر اولسون

اول سر کویا اگر دوشسه گذاریم بو گئجه

وار ایدی صبح وصالینا فضولی اومّید

چیخماسا حسرت‌ایله جانِ فگاریم بو گئجه

شاعر: ملامحمد فضولی

:: موضوعات مرتبط: فضولی، ،

زلفو کیمی آیاغین قویماز اوپم نیگاریم

 

یوخدور اونون یانیندا بیر قیلجا اعتباریم

انصاف خوشدور ای اشک! آنجاق منی زبون ائت،

ها بؤیله محنت ایله کئچسین‌می روزگاریم؟

بیلدی تمام عالم کیم دردمند عشقم

یارب هنوز حالیم بیلمزمی اولا یاریم

وصلیندن آیری نولا قانیم توکولسه گول- گول،

من گلبن خزانم، بو فصل‌دیر بهاریم

تصویر ائدن وجودوم یازمیش الیمده ساغر

رفع اولماغا بو صورت، یوخ الده اختیاریم

دور ایسته‌من زمانی، مئی نشئه‌سین باشیمدان

تورپاق اولاندا یارب! دُرد مئی ائت غباریم

رسوالاریندان اول مه سانماز منی! فضولی!

دیوانه اولماییم‌می، دونیاده یوخمو عاریم؟

شاعر: ملامحمد فضولی

:: موضوعات مرتبط: فضولی، ،
:: برچسب‌ها: روزگاریم,

وورما اوقاره تئللرینه شانه سئوگیلیم

 

ائتمه منی بلاکش دیوانه سئوگیلیم

یاندیردی حسرتین منی، گؤستر جمالینی

کؤنلوم اولوب اول آتشه- پروانه سئوگیلیم

بیر دفعه ائیله دیمسه، تمنای وصلینی

یوز دفعه یاندیم- آتش هجرانه، سئوگیلیم

گزمه رقیبله منی غیرت هلاک ائدیر

سالما بلالی عاشقینی قانه سئوگیلیم

گؤسترمه قاره خالینی، کؤنلوم فغان ائدیر

قوش، ده‌ن، گؤرنده تئز گلیر افغانه سئوگیلیم

یوز لیلی گؤرسه حسنونی مجنون اولار سنین

عشقینده اوز قویاردی بیابانه سئوگیلیم

انصافی اولسا چرخ، بو بیچاره «واحدی»

حسرت قویارمی، سن کیمی جانانه سئوگیلیم؟

منبع:shear.blogsky.com

:: موضوعات مرتبط: واحد، ،
:: برچسب‌ها: سئوگیلیم(واحد),

سوئیله ای گول، هانسی باغین، سن گولِ رعناسی‌سان؟

 

هانسی گلزارِ بهشتین، سروی سن، طوُباسی‌سان؟

آچما زولفون عطریله بیهوش ائدرسن عالمی

چونکی سن دشتِ خطانین، عنبرِ ساراسی‌سان

نازنین جانان گؤزه‌للر، قارشی دُورماز روُیینه

جمله سیندن سن گؤزه‌ل‌سن، هامی‌نین اعلاسی‌سان

باغبانین کیملر اولموش؟ گؤزلرین حئیرانی‌یام

سن مگر گلزارِ حُسنون نرگس شهلاسی‌سان؟

گؤرمه‌یینجه گول اوزون، جسمیمده قالماز طاقتیم

روحی‌سان گویا، بو مسکین عاشیقین، اعضاسی‌سان

من کیمی مینلرجه مجنولار، اسیروندیر سنین

سؤیله یاریم، دوغرو سؤیله، سن کیمین لیلاسی‌سان

اینجیمه‌ز، «واحد»، او گول آه و فغانیندان سنین

سن گؤزه‌للر باغی‌نین بیر بولبولِ شیداسی‌سان

:: موضوعات مرتبط: واحد، ،
:: برچسب‌ها: رعناسی‌سان؟(علی آقاواحد),

من بیلوسوزکه سیزلره یاخشی وکالت ایلرم

آب  زلالدن سیزون فکروزی  راحت ایلرم

قازدِدی سن قلفتیسان سؤز یتورنمیسن داداش

سن گلیفی یاش ایلسن سو گتورنمیسن  داداش

سار دِدی سیز گلون منه رأی ورون تفاقیله

من  که مودّت اهلی یم یوخدی ایشیم نفاقیله

زاغ  دِدی  گرچه  وارسنون شاقاواتون صلابتون

چوخ گوتی بوش جبونسن ذرّه جه یوخ شجاعتون

بلدیرچین دِدی که من مزرعه لرده باغبانام

بوغدا  منیم  الیمده دور بنده  عزیز دهقانام

بط دِدی گرچه صحبتون خوشدی گوزل صدالیسن

کتلی  سن  عقل  سالیمون  یوخدی  قالین  قفالیسن

ضرنا دُهُل دن ال چکوب آنلاماسوزنمازنَدی

واجب  و مستحب  نَدی غسلیله دستماز نَدی

ایمدی  گلون  تفاقیله   رأی  وِراخ  پرستویا

دانش وفضلیده اونون اوخشاری وارارستویا

طوطی  دِدی  پرستو بو امره   دخالت  ایلمز

چونکه اوخانه داریدی هِچ ایشه شرکت ایلَمز

دوردی   تویوخ   دِدی  منیم  خلقه  ایاندی  خدمتیم

گونده بیرین یومورتارام واردی  هر اءوده حرمتیم

مجلسه  گِتسم  ایشلرم  هر نجه چالساز اوینارام

یاخشی دویونجا دَن یِسم گونده بشین یومورتارام

سویلدیلر  جهنّم   اول   هرزه  دانیشما  آی  تویوق

سن هارا پارلمان هارا بانلاما چوخ سویوق سویوق

فرض اِدیسن پارلمانی دانس اِدوب اویناماق یری

مجلس  مشورتدی  بو  بیل نه  یومورتاماق یری

سن بالا گِت سوخول نینه فکر ریاست ایلمه

جوجه لرون یتیم قالار بو ایشه شرکت ایلمه

سنده   که  یوخدی  بیرهنر اولسا جهانی  اوتداسان

آیری بیر ایش باشارماسان پسلاشاسان یوموتداسان

گوردیلر اوردک اَگلشوب بوینون اَیوب باتوب یاسا

دوردی  گلوب  یاواش یاواش  یانلارینی باسا باسا

عرض اِلدی منیمده  گراولسا بوایشده سبقتیم

دولته   دینه   میهنه  صلح  و صفادی  نیّتیم

:: موضوعات مرتبط: کریمی مراغه ای، ،
:: برچسب‌ها: قسمتی دیگر ازشعرعهدسلیمان(کریمی مراغه ای),

ثبت اِلیوب کتابته بوسؤزی اهل داستان

عهد  سلیمانا  وِروب  نسبتینی مورخان

مجلیسینه  اوسرورین  حاضر اولاردی  جنّ و انس

خیل وحوش ودیو و دد صنف به صنف جنس جنس

گوردیله  کیم  بو  مطلبی  ایلدی قوشلاراتفاق

علتی یوخدی بیزاولاخ مجلس شاهیدن اوزاق

قوشلارایچینده هایهو اولدی اوجالدی غاءله

گوتدیله   نامه   یازدیلار بایقوشا بو سیاقله

بیزده  شها  بو عصریده  علم  و مدرس ایستروخ

سن بیزه لطف ومرحمت بذل اِله مجلس ایستروخ

بیزنه روابومجلسین فیضینه نایل اولمیاخ

نیلمیشوخ  سلیمانا بزمینه  داخل  اولمیاخ

شاه باخوب رعیّته بولدی صواب مجلسی

بیر نچه  انضباطیله آچدیلا  باب مجلسی

بایقوش اودمده یوزدوتوب قوشلارا ایلدی خطاب

اوز ایچووزیزدن ایلیون بیرنچه شخصی انتخاب

بیر اِله قوش وکیل اِدون مست ریاست اولماون

دولته  دینه   میهنه  فکری  خیانت   اولماسون

خلق گرک وکالته بیرکسی انتخاب اِده

تا وطنه  دوز ایشلیه ملتی  کامیاب اِده

بیرده وکیل اولان گرک ملته خیرخواه اولا

دولته  خاءین  اولمیا  جای  وثوق شاه اولا

چون نچه قرندن قباق دوشدی بوامر اتفاق

اکدی  نفاق  تخمینی  بیرنچه صاحب نفاق

ایندی ده صلح اولونمیوب اکدیقی ریشه بر وِرور

قرن به قرن   ایل به ایل  ملته  پیس  ثمر  وِرور

سیزده بوایشده سعی اِدون بغض وعنادی بوشلیون

ملته   شاهه   میهنه   صلح  و صلاحی  بوشلیون

قوشلاراو دم قانادچالوب  وِردیله جمله سس سسه

هورّا  سسیندن  الغرض  زلزله  دوشدی  مجلیسه

سرچه  دِدی سیغیرچقون واربوایشه  لیاقتی

قارقا دیردی قرقینون یاخشی چیخار وکالتی

بعضی  دِدی  وکالته  خلق اولونوب قولاقلی قوش

هم گوزآچوخدی کلّه لی صاحب عقل وفهم وهوش

دورنا  دِدی  گلون  بالام  بلبلی انتخاب اِداخ

خوش دیلی واروکالته یاخشیدی انتخاب اِداخ

بعضی  دیردی  بلبلین  یوخ  بو  ایشه  بصیرتی

عیاش اولوب کِف اهلیدی هاردا گوروب وکالتی

بوشلار ایشین قویارگِدر سیروسیاحت اِتماقا

وقتی یتورمز اگلشوب مجلسه شرکت اِتماقا

قالخوب آغاج دَلن دِدی منده بوبزمده وارام

واردی الیمده صنعتیم خلق بیلورکه نجّارام

سسلدیلر وکیل  گرک سؤزبیله  صنعت  ایستمز

نجّاراوغول خبیث اولار یوزده اونی دوزایشلمز

یاش  آغاجین میاندابین گتدی  دوزتدی پنجره

چکدی زامسقا سونباتا حیله بولولله مین جوره

گوی قجله بویوردی من بوایشده صاحب یَدم

گر منی  ایلسوز وکیل اجریده چوخدی سیّدم

سسلدیلر  سیادتین   ربطی   ندور وکالته

سن نیه اوزمقامووی پیش گلیسن جماعته

قاز دِدی سیزگلون منه رأی وِرون وکیل اواوم

هم   بلدم  قضاوته  همده  اوزوندی  اَل  قولوم

ذکر   جلی    قیافه لی    نابغه یم   دلاورم

یرده تویوق هواده قوش بحریده هم شناورم

بوبّو دِدی سنون داداش قدّون اوزوندی مطلقا

بیز سنه  رأی   وِرمّروخ  کُلِ  طَویل  احمقا

لیک  قبول  اِتسه لر من بومقامه بهترم

خلق گورورله خلقتاً صاحب تاج افسرم

سرچه دِدی بوگوت کی وارسنده جهانی پوخلاسان

هر یِره  گتسن آی  جانیم  یورد و یوانی  پخلاسان

بعضی دِدی  گلون حاجی  لیلکی ایلیاخ وکیل

مؤمن آدامدی چون گِدربیت خدایه ایل  به ایل

قوشلار  ایچینده   واقعاً   محترم   و شریفیدی

وارآدام اوزلی پالتاری سلقه لی چوخ نظیفیدی

قرقی دِدی اگراونون اولماسا اوزگه علتی

بسدی  یقین  اِدون اونا حاجیلیقون قساوتی

دوز حاجی اوزگه نین مالین غصب اِلیوب یالان دِمز

اوزگه   چولونده   اوتلیوب   قورباغا   و ایلان  یِمز

جهد اِلیون  بو ایشده  بیر اهل  بصیرت آختارون

عقلیویزاولسون اویمیون صورته سیرت آختارون

اَبله  آدامدی  واقعاً  تُولانان ایندی  ظاهره

زهد و ریاسینی گوروب آلّانیسوز تظاهره

یادیمه دوشدی بیرخبرقوی سیزه عرض اِدوم نِجه

بو  خبری   دیوب   منه   قارقا   آغاجدا بیر گِجه

 

         قرقی حکایت دیور

رومده  پاپ  اعظمی  دعوت  اِدوب ارامنه

شهربه شهر سیراِدوب خلق باخوب مقامینه

رومه یاخینلاشوب غرض  خیل وجلال جاهیله

غبطه  اِدیردی  شوکت  و شأنینه  مهر وماهیله

چونکه رییس قومدی صاحب علم وفضل وجود

چیخدیلا   پیشوازینه   مسلم   و  ارمنی   جهود

خوش آغاروبدی قاشلاری سقّلی نافدن گِچوب

زهد   و ورع  لباسینی  قامتینه  قضا  بیچوب

صنف  ارامنه  باخور   گل  یوزینه  فرحلنور

بیر بیرینه نشان  وِرور گورنِجه نوردر کلنور

کثرت    و   ازدحامدی   خلق   اِدیردی   هلهله

بعضی شریف کیمسه لر گویدی وِروردی اَل اَله

بعضی اُوپوب ایاقینی بعضی دوتورلباسینی

بعضی  چکور  تبرّکاً  گوزلرینه  عباسینی

بیراوجا بویلی ارمنی عقلی بیر آزضعیفیدی

گولمه لی  بد  قیافه لی  خیلی آریق نحیفیدی

موکب پاپ اعظمی قصداِدوب  اشتیاقیله

لیک باساردیلار دالی خلق اونی اتفاقیله

هی  سوخولاردی تایته محضرپاپ اعظمه

فوری ووراردیلارچکیل یانه قوشولما آدمه

پاپ گورن زمان اونی قلبی یانوب اوحاته

سسلدی سالمیون اونی چوخدافشاروزحمته

کوچه آچوبلا تا گلوب دوردی به اسم احترام

سینیه  قویدی  اللرین  وِردی  ادبله  بیرسلام

عرض اِدوب ای محاط اولان علمی محیط عالمه

گوگلیمی   آل   جواب   وِر  لطفیله   بو سؤالیمه

اوچ  گوز  اِدیدی  خلق  اگر خلقده  خاتق  انام

هاردا قویاردی بیرگوزی سویله جواب والسّلام

پاپ دِدی نه سؤزدی بوهِچ بِله بیرسؤزاولمیوب

ایمدیه تک زمانه ده بیرکسه اوچ گوز اولمیوب

فرض اِلیاخ خدا اگربیرگوز اضافه خلق اِده

آنّی گزلدی نسبتاً یوخ یری اوزگه عضویده

گولدی  او شخص  عرض اِدوب فایده یوخ جبینیدن

اسراف اولاردی حق اوزی خوش دگی مصرفینیدن

پاپ بویوردی بس گرک دال طرفینده خلق اولا

هم  قاباقی  گورر آدام  بیر گوزیده  باخار دالا

سویلدی دالدا اولسا گر گوزلرینون اضافه سی

اوندا اولاردی انسانین گولمه لی بیر قیافه سی

پاپ  بزرگ هر یری وِردی نشان اَل آچمادی

گتدی  دلیل  ردّ اِدوب قانع اولوب سووشمادی

پاپ  غضبلنوب  دِدی  یورما  منی  اَل  آچ  گورک

سن دی گوروم اوبیرگوزی هاردا قوییدی حق گرک

قوزادی بارماقین  دِدی گرچه محالدور سؤزوم

بارماقیمون باشیندا ای کاش اولیدی بیر گوزوم

بوردا سوخیدیم اَنسه وه کشف اِلییدیم علتی

ظاهریویله    باطنون   وار   نقدر  تفاوتی

ظاهراً آغدی خلعتون سویملیدور نظافتون

ضدّ نقیضدور ولی  صورتویله   سیرتون

یاخشی ریا و رنگیله تولامیسان جماعتی

دام  فریب و مکریله  اولامیسان بو ملتی

فوج    طیور   گوردیلر  قرقیدا  بو فصاحتی

سویلدیلرکه بس اوزون عهده وه چک وکالتی

گولدی دِدی چتین گِدم من بوایشین سراقیمه

من باشیمی قاتقلیوب  قویمارام  ایت قباقینه

سقّا  قوشی  دِدی سیزه  نوکرافتخاری یم

مشک واریمدی قوشلارا خادم آبیاری یم

:: موضوعات مرتبط: کریمی مراغه ای، ،
:: برچسب‌ها: قسمتی ازشعرعهدسلیمان(کریمی مراغه ای),